بعض الكلمات باللغة المحكية ...
(رسالة مع وقف التنفيذ )
مسكت القلم لأكتب رسال/ي
نشف الحبر واتكسّر مقالي
على الايام و سنين اللي راحت
على الهموم بعيون الغوالي
صفنت بدفتري اللي صار اسودْ
سطوروا متل عتمات الليالي
بكتبْ عالفرح بخليه أقربْ
من الاقواسْ وأخوتها النبال ِ
ولاّ عالحزنْ لو كانْ مصدر
طريق الناسْ في قطع الوصال ِ
حرتْ بوحدتي والمخ سكّر
وْلا في حدا يردلي سؤالي
قضيت الليلْ حتى الكونْ أصبح
ومابعرف يميني من شمالي
فجأه ْطير عالشباك وقـّفْ
أنشد وغرد ورفرف قبالي
قلت بخاطري هالطير يمرح
شوذنب الطفلْ بعراك الرجال ِ
رجعت لدفتري والورق أبيضْ
والسطر يلمع مثل اللآلي
ربيع العمر بالأزهار فــتـّـح
والعنبْ طابْ عغصون الدوالي
سلامي مع نسيم الحب أبعث
لأهلي والصحاب وكل غالي
عسى فجر السلام يكون شقشق
وينهي الحربْ بساحات القتال ِ
اسماعيل سليمان
ليست هناك تعليقات:
إرسال تعليق